'राष्ट्रीय शैक्षणिक धोरण २०२०' भारतीय पारंपरिक ज्ञानावर आधारभूत असल्याने प्रा. डॉ. इस्मैल केल्लेल्लु लिखित आणि प्रा. डॉ. मदन कुलकर्णी यांनी भाषांतरित केलेला 'कर्नाटकातील मंदिरे' आणि त्यांची आर्थिक सामाजिक भूमिका' हा ग्रंथ विविध शैक्षणिक शाखेतील विद्यार्थ्यांना तसेच अभ्यास् वाचकांना प्रभावित करणारा ठरावा. मंदिरांची उभारणी करतांना विशिष्ट दैवतांविषयी आस्था आणि आर्थिक सामाजिक जीवनाचे उन्नयन करण्याचा दृष्टिकोन आपल्या पूर्वजांनी केलेला होता. मंदिरे शिक्षणाची केंद्रं होती. शिल्पकलांबरोबरच ललित कलांचे संवर्धन आणि विविध शास्त्रांचे अध्ययन-अध्यपनाचे कार्यही मंदिरात होत असे. मंदिरांना प्राप्त होणाऱ्या देणग्या, त्यासाठी लागणारे व्यवस्थापन (बँकींग व्यवस्था, जमा खर्चाची मांडणी, अंकेक्षण, त्यासाठी लागणारा कर्मचारी वर्ग इत्यादी.) याची काळजीही घेतली जात होती. डॉ. इस्मैल केल्लेल्लु यांनी पुरातत्त्वीय शिलालेख आणि ताम्रपट यांच्या पुराव्यांद्वारे हे संशोधन आणि विश्लेषण मुळात इंग्रजीत केले आहे, त्याचे मराठी विषयानुगामी भाषांतर, अनुवाद, अनुसरण प्रा. डॉ. मदन कुलकर्णी यांनी केले आहे. आस्तिक आणि नास्तिक ह्या दोन्ही वर्गांसाठी हा ग्रंथ वाचनीय झाला आहे. मंदिरांकडे बघण्याचा नवा आणि अभ्यासू दृष्टीकोन या ग्रंथाच्या माध्यमाने प्राप्त होईल यात शंका नाही

डॉ. विनायक श्रीधर देशपांडे कुलगुरू

जी एच रायसोनी विद्यापीठ, अमरावती अध्यक्ष,

विदर्भ संशोधन मंडळ,

नागपूर माजी प्राध्यापक-संचालक व्यवसाय व्यवस्थापन विभाग

माजी प्र-कुलगुरू आणि माजी कुलगुरू (प्रभारी) राष्ट्रसंत तुकडोजी महाराज नागपूर विद्यापीठ