काहीजणी आजच्या एकविसाव्या शतकातही बंधनात आहेत. अशा सख्यांना सिद्ध लेखिका समूह म्हणजे त्यांच्या कल्पनांना भरारी देणारे मुक्त नभांगण वाटू लागले. त्यांच्या पंखात बळ येऊन त्या झेप घेऊ लागल्या. सिद्ध लेखिका समूहात साहित्यातील विविध साहित्यप्रकारासोबत खियांच्या सुप्त कलागुणांनाही वाव मिळण्यासाठी अनेक उपक्रम राबविले जातात, कार्यशाळा घेतल्या जातात. त्यातीलच एक उपक्रम म्हणजे पाककला कार्यशाळा. ही कार्यशाळा घेतली तेव्हा अक्षरशः पाककृतींचा पाऊस पडला. प्रत्येक स्त्री ही अन्नपूर्णा असते. तिच्या हाताला एक वेगळीच चव असते. त्यात माया आणि प्रेम, संस्काराचे घुटी मिसळली की पदार्थ रुचकर होतात. प्रत्येक गृहिणी स्वतःच वेगवेगळ्या पाककृती शोधून काढते. नवीन काहीतरी बनवते. काही परंपरागत ती शिकलेली असते. या पाककृती लेखणीतून शब्दबद्ध करणे हे देखील एक लेखकौशल्य आहे. हे कौशल्य विकसित करण्यासाठी सिद्ध लेखिका समूहात पाककला लेखन कार्यशाळा घेण्यात आली होती. या पाककला लेखन कार्यशाळेत सर्व सुगरण सख्यांच्या पाककृतीचा आस्वाद आम्ही घेतला. एक दिवस अंजली मराठे मला म्हणाली आपण सर्व पाककृती एकत्रित करून त्याचे ई बुक बनवू म्हणजे सर्वांजवळ ह्या पाककृती राहतील. सर्वजणी स्वतःसोबत इतरांच्या पाककृतीचाही आस्वाद घेऊ शकतील. मला तिची कल्पना पटली. त्या कल्पनेतून "सिद्धरुचिरा भाग १" हे ई बुक साकारले.